Ва ўсе часы абарона Айчыны была пачэсным абавязкам. Сучасныя Узброеныя сілы Рэспублікі Беларусь з’яўляюцца надзейнай абаронай ад знешняй пагрозы, апорай на шляху стабільнага развіцця краіны. Сапраўдную школу мужнасці і патрыятызму праходзяць сення маладыя людзі, якія нясуць воінскую службу ў розных родах войск. Глыбока сімвалічна, што Дню Перамогі папярэднічае Дзень абаронцаў Айчыны і Узброеных Сіл Рэспублікі Беларусь.

22 лютага ў рамках правядзення школы актыўнага грамадзяніна “Радзіма мая Беларусь у асобах. Абаронцы Айчыны” адбылася сустрэча са старшым афіцэрам па грамадзянска-патрыятычным выхаванні в\ч 5524, кіраўніком патрыятычнага клуба “Паўночны” Віталіем Уладзіміравічам Авечкіным. Аповед запрошанага госця пра мэты і дзейнасць клуба для падлеткаў суправаджаўся змястоўнымі відэа і цікавымі фотаздымкамі. Віталій Уладзіміравіч расказваў пра службу ва Узброеных Сілах РБ, выбар прафесіі, якасці вайскоўца, неабходнасць здаровага ладу жыцця, сямейныя каштоўнасці. Акцэнтаваў увагу на тое, наколькі важна з дзяцінства прывіваць чалавеку любоў да сваёй краіны і малой радзімы, выхоўваць маладое пакаленне на сваім прыкладзе.

Затым вучні знаёміліся са спаборніцтвамі вайскоўцаў – Міжнароднымі армейскімі гульнямі, спецыфікай кіналагічнай службы, прыкладамі гераізму і самаахвярнасці ў наш час, людзьмі, якія атрымалі ганаровае званне “Героя Беларусі”.

Падчас сустрэчы ўздымалася шмат пытанняў пра патрыятызм, жыццёвы выбар, усведамлення сябе як грамадзяніна Беларусі. Нездарма эпіграфам мерапрыемства сталі словы славутага песняра Беларусі Якуба Коласа: «Няма ў чалавека нічога прыгажэй і даражэй за радзіму. Чалавек без радзімы ‒ бедны чалавек».