“Пяшчота роднага слова…”

Пад такой мілагучнай назвай прайшоў у нашай школе напрыканцы лютага Тыдзень роднай мовы. Вучні 6-8 класаў былі запрошаны на гульню “Ты мне, я табе”, дзе за званне самай інтэлектуальнай каманды змагаліся “Васількі”, “Зоркі” і “Мовазнаўцы”. Пытанні былі не толькі з галіны мовы, літаратуры і культуры, але і на кемлівасць і логіку. А яшчэ каманды задавалі пытанні адна адной, прытым выбіралі найцяжэйшыя. У выніку пз невялікім адрывам перамаглі “Зоркі” (Шымко Паліна, Жалейка Святлана, Лаўрыновіч Мілана і Каладынская Кацярына). У сераду 21 лютага на Дзень роднай мовы вучняў і настаўнікаў зраніцы віншавалі васьмікласнікі. Кожны атрымаў або закладку з афарызмам пра родную мову, або салодкі падарунак. Потым прайшлі міні-віктарыны для вучняў 3 і 4 класаў. У чацвер у школу завітаў “Буслік” з інтэлектуальнымі заданнямі, у якім прынялі ўдзел 11 вучняў нашай школы.

У суботу вучні 5-11 класаў удзельнічалі ў пазнавальным турніры “Святы і абрады нашых продкаў”, які складаўся з наступных тураў: “Рэлігійныя святы”, “Каляндарныя абрады”, “Сямейныя абрады”, “Нематэрыяльная спадчына Глыбоччыны”, “Фальклор” і “Пагутарым на роднай мове”. Тры каманды – “Ажыны”, “Ядваб” і “Стакротка” – адказвалі на пытанні, абгрунтоўвалі свае здагадкі, спявалі і зараблялі бонусы – салодкія падарункі.

Падчас правядзення Тыдня роднай мовы сапраўды панавала пяшчота роднага слова, а ўдзельнікі мерапрыемстваў пашырылі не толькі свой слоўнікавы запас, але і звесткі па гісторыі і культуры нашай краіны.