Мая мова – мелодыя сэрца

Пад такой назвай прайшоў у нашай школе тыдзень роднай мовы. Панядзелак – дзень гульні. Вучні 3 і 4 класаў атрымалі творчыя заданні і пазнаёміліся са сваімі куратарамі: трэцякласнікі на працягу тыдня павінны размеркаваць радкі верша, вывучыць і запісаць відэаролік https://disk.yandex.by/i/HrjLGkb8G5ODhA (куратар Лось Лізавета), а 4 клас зрабіць фотаздымак, каб было бачна, што дзеці вучацца ў беларускай школе (куратар Багіраў Марат). А вучні 5 і 8 класаў ўдзельнічалі ў пазнавальнай гульні “Размаўляем па-беларуску”. Гулялі дзве каманды – “Ульянка” і “Паўлінка”. Налічаныя балы размяркоўваліся паміж членамі каманды як бонусы да адзнак на ўроках.

Аўторак – дзень размалёўвання шэрасці. Кожны клас з 5 па 11 атрымаў частку адной карцінкі і размаляваў яе. Сабраныя часткі былі злучаныя ў адно, атрымалася каляровая прыгожая любімая школа.

Серада – дзень рэбусаў, а чацвер – дзень крыжыванак. Кожны клас атрымаў заданні і да канца вучэбнага дня неабходна было іх разгадаць. Вучні 5-8 класаў справіліся хутка, а старшакласнікам было цяжэй, і яны не адгадалі па адным слове.

Пятніца – Дзень роднай мовы і завяршэнне тэматычнага тыдня. Інтэрактыўная гульня “Мова родная” аб’яднала вучняў 4, 5 і 7 класаў. За першынство змагаліся тры каманды – “Зоркі”, “Разумнікі” і “Знаўцы”.

Актыўныя ўдзельнікі тыдня роднай мовы атрымалі сувеніры і салодкія падарункі.