Падарунак ­– уласная кніга

Удзелаўшчына багатая на таленты, і напрыканцы мая ў школе адбылася незвычайная сустрэча. Чаму незвычайная? У год беларускай жанчыны госцяй літаратурнай гасцёўні стала Будзько Зінаіда Іванаўна, якую мы звычайна бачым у белым халаце і звяртаемся па дапамогу, калі дрэнна сябе адчуваем. Але на гэты раз перад намі паўстала медык па прафесіі, але рамантык у душы. Мы даведаліся, што Зінаіда Іванаўна добра малюе і нават піша вершы. Больш за тое, нядаўна, да сямідзесяцігадовага юбілею, родныя зрабілі ёй падарунак – зборнік вершаў “Голас маёй душы”.

Вучні і настаўнікі задавалі шматлікія пытанні, і Зінаіда Іванаўна ахвотна адказвала, дзялілася ўспамінамі і, канечне, чытала ўласныя вершы.  Нарадзілася яна ў вёсцы Сазонаўшчына, закончыла Дзеркаўшчынскую школу, затым вучылася ў Полацкім медыцынскім вучылішчы. Працаваць прыехала на радзіму. У сям’і, акрамя Зінаіды Іванаўны, былі яшчэ тры сястры і брат. Паэтычных здольнасцей ні ў кога з радні не было, ды і ў школе цікавасць была больш да матэматыкі, але аднойчы ў бальніцы напісала падзяку медперсаналу ў вершаванай форме. Атрымалася нядрэнна, усім спадабалася. Потым быў верш пра турыстаў з Калугі, затым на курсах трэба было напісаць памятку для дзяцей па правілах гігіены. Пакуль не прыйшла працаваць у школу, часу на вершы не было.  І вось ужо васямнаццаць гадоў Зінаіда Іванаўна спяшаецца на дапамогу вучням і настаўнікам нашай школы і піша вершы. Родны дом, радзіма, прырода, душа, Бог – вечныя тэмы, якія хвалююць кожнага неабыякавага чалавека. “Ты дзверы адчыні ў душу”, “Асенні лес”, “Беларусь – любімая краіна”, “Захоўвай гігіену”, “Тут людзі працавітыя жывуць”, байка “Варона і лісіца”…

Перад юбілеем сёстры папрасілі рукапісы, аддрукавалі вершы і зрабілі заказ ў друкарні г.Жлобіна. Так з’явіліся 15 асобнікаў зборніка вершаў “Голас маёй душы” – падарунак на дзень нараджэння.

Не кожнаму дадзена такая магчымасць – у дробязях бачыць прыгожае, і мы ганарымся, што сярод нас жыве і працуе такі творчы чалавек – Будзько Зінаіда Іванаўна.

Лопашава Настасся, Лаўрыновіч Мілана,

вучаніцы 8 класа Удзелаўскай сярэдняй школы