Гонар, сіла і душа народа

Пад такой назвай у нашай школе 16 студзеня прайшло мерапрыемства, прысвечанае Году беларускай жанчыны. Сапраўды, у жанчыне дзіўна спалучаюцца моц духу і слабасць, пяшчота і цвёрдасць характару, прыгажосць і непадступнасць. Вучні падбіралі асацыяцыі, разважалі пра ролю жанчыны ў грамадстве, успаміналі знакамітых зямлячак, вядомых усяму славянскаму свету.

 На працягу шматвяковай гісторыі многія жанчыны пакінулі сваімі справамі значны, непаўторны след на зямлі. У кожнай з іх было рознае жыццё. Беларуская жанчына заўсёды ўмела быць моцнай, нават калі было вельмі цяжка. Па асацыятыўных карцінках вучні адгадвалі імя вядомай жанчыны і ўспаміналі цікавыя біяграфічныя факты. Так, размова вялася пра непакорную Рагнеду, лекара Саламею Русецкую, драматурга Уршулю Радзівіл, асветніцу Ефрасінню Полацкую, капітана Эмілію Плятэр, княгіню Анастасію Слуцкую, пісьменніцу Алаізу Пашкевіч, актрысу Стэфанію Станюта, лёгкаатлетку Юлію Несцярэнка, касманаўта Марыну Васілеўскую. Пра некаторых вучні ведалі з урокаў гісторыі і літаратуры, а некаторыя імёны пачулі ўпершыню.

З гэтага ўступнага мерапрыемства пачаўся доўгатэрміновы праект нашай школы да Года беларускай жанчыны, падчас якога штомесяц вучні і настаўнікі будуць бліжэй знаёміцца з жанчынамі-мнагадзетнымі маці, жанчынамі-кіраўнікамі, майстрыхамі, падарожнікамі і г.д.  2026 год, абвешчаны Годам беларускай жанчыны, — гэта знак павагі да жанчын, удзячнасць за іх працу і клопат, напамін пра іх ролю ў гісторыі і сучаснасці краіны.